झुम्साबाट बुटवलमा पानी ल्याउन ६ अर्बको योजना
लुम्बिनी संवाददाता
बुटवल
पाल्पाको तिनाउ गाउँपालिकास्थित झुम्सा खोलाबाट खानेपानी बुटवल ल्याउने आयोजनाको काम सुरु भएको छ । बुटवलमा रहेको खानेपानीको अभाव पूर्तिका लागि यो महत्वपूर्ण योजना हो । केही वर्षअघि सुरु भए पनि यो योजना बीचमै रोकिएको थियो ।
बुटवल खानेपानी योजनाअन्तर्गत झुम्साको पानी ल्याउने काम फेरि सुरु भएको हो । ६ अर्ब ३५ करोड ३५ लाख लागतमा बन्ने यो योजना पूरा भएपछि बुटवलमा करिव ६ करोड लिटर दैनिक पानी आउनेछ । यसले आगामी १५ वर्षका लागि पुग्ने बताइएको छ । बुटवलमा १५ वर्षपछि जनसंख्या तीन लाख पुग्ने प्रक्षेपण गरिएको छ । अहिले करिव पौने दुई लाख रहेको छ ।
खानेपानी मन्त्रालयअन्तर्गतको नेपाल खानेपानी संस्थानले बुटवल उप–महानगरपालिकाका सबै वडामा प्रशोधित खानेपानी आपूर्ति गर्ने उद्देश्यले खानेपानी आयोजनाको काम अघि बढाएको हो ।
संस्थानले पाल्पा जिल्लाको तिनाउ गाउँपालिकामा अवस्थित झुम्साखोलामा बाँध तथा इन्टेक निर्माण गरी पानी प्रशोधन गरेर उप–महानगरपालिकाका सबै वडामा खानेपानी सेवा विस्तार गर्न लागेको छ । झुम्साखोलामा बाँध तथा इन्टेक निर्माणको बिहीबार शिलान्यास गर्दै सङ्घीय सरकारका अर्थमन्त्री विष्णुप्रसाद पौडेलले आयोजना समयमै सम्पन्न भई बुटवलको खानेपानी समस्या समाधान हुने विश्वास व्यक्त गरे । ‘यो आयोजना खानेपानी संस्थानको प्रतिष्ठासँग जोडिएकाले समयमै सम्पन्न गरेर बुटवलबासीको विश्वास जित्न जरूरी छ ।’
अर्थमन्त्री पौडेलले आयोजना सम्पन्न गर्न बजेटको अभाव नहुने आश्वासन दिँदै सचेत भएर समयमै काम सम्पन्न गर्न आग्रह गरे । ‘कुनै पनि हालतमा आयोजना असफल हुन नदिनेतर्फ सचेत खानेपानी संस्थान र सडक डिभिजन सचेत हुनुपर्छ, तपाईँहरू समन्वय गरेर काम गर्नुस् ।’– अर्थमन्त्री पौडेलले भने ।
उनले विकासका काममा हातेमालो गरेर अघि बढ्न बुटवल र तिनाउ गाउँपालिकाका जनप्रतिनिधिलाई आग्रह गर्दै यहाँका जनताका आवश्यकतालाई केन्द्रमा राखेर काम गर्न सुझाए । ‘बुटवलको शिर तिनाउ गाउँपालिका र आर्थिक केन्द्र बुटवल उपमहानगर भएकाले सहकार्य गरी अगाडि बढ्नुपर्नै पर्छ ।’
आफ्नो पानीको मुहानको पानी दिएर तिनाउबासीले बुटवललाई ठूलो गुन लगाएको बताउँदै अर्थमन्त्री पौडेलले तिनाउ र बुटवलको सुन्दर भविष्यको परिकल्पना साकार पार्न यसैगरी एकार्काको साथ आवश्यक हुने जनाए ।
सो अवसरमा लुम्बिनी प्रदेशसभाका सदस्य तुलाराम घर्तीले तिनाउ गाउँपालिका क्षेत्रका विकासनिर्माणका कामलाई प्राथमिकता दिन र विकासका काममा सहकार्य गरेर अगाडि बढ्न आग्रह गरे । तिनाउ गाउँपालिकाका अध्यक्ष ओमबहादुर घर्तीले मुहानको संरक्षणमा स्थानीय नागरिकको भूमिका महत्वपूर्ण हुने भएकाले उनीहरूका माग पूरा गर्न आग्रह गरे ।
खानेपानी मन्त्रालयका सचिव माधव बेल्वासेले बुटवलको आगामी १५ वर्षपछिको मागलाई ध्यानमा राखेर झुम्साबाट तीन करोड २० लाख लिटर पानी थप गरी करीब तीन लाख जनसंख्या लाभान्वित हुने गरी दैनिक करीब पाँच करोड ९० लाख लिटर पानी उत्पादन तथा वितरण गर्ने लक्ष्य राखिएको बताए ।
खानेपानी संस्थानका महाप्रबन्धक भूपेन्द्रप्रसादले पहिलो चरणमा झुम्साखोलामा बाँध निर्माण गर्ने, ट्रस पुल बनाउने र पाइप बिछ्याएर पानी ल्याउने तथा दोस्रो आयोजनाको कामअन्तर्गत बुटवल–३ स्थित रामफेदीमा पानी प्रशोधन प्लान्ट बनाउने र भण्डारण ट्याङ्की बनाएर पानी वितरण गरिने जानकारी दिए । सो आयोजनाको कूल लागत रु छ अर्ब ३५ करोड ३५ लाख छ । उपमहानगरपालिकाका सबै वडामा २४ सैं घण्टा खानेपानी उपलब्ध गराउने उद्देश्यले सो आयोजना सुरु गरिएको हो ।